Tailandda beynəlxalq turistlərin sayı azalır
Tailand turizmində bu ilin ilk yarısı üçün narahatedici statistika qeydə alınıb. Rəsmi məlumatlara görə, 2025-ci ilin ilk altı ayında ölkəyə gələn beynəlxalq turistlərin sayı 5 faiz azalıb. Turist sayındakı bu geriləmə əsasən Çin bazarından olan ziyarətçilərin sayının kəskin düşməsi ilə əlaqələndirilir.
Turizmplus.az xəbər verir ki, xüsusilə Çinli turistlərin Tailandı ziyarət etmə göstəricilərində 34 faiz azalma müşahidə olunub. Turizm mütəxəssisləri bu azalmaya səbəb kimi regiondakı iqtisadi qeyri-sabitlik, viza rejimləri və aviabiletlərin bahalığını göstərirlər.
Digər tərəfdən, bəzi ölkələrdən – Hindistan, Yaponiya, Avstraliya və ABŞ-dan gələn ziyarətçilərin sayında müəyyən artım qeydə alınıb. Lakin bu artım ümumi mənzərəni xilas etmək üçün yetərli olmayıb.
Tailand Turizm İdarəsi (TAT) yaxın aylar üçün yenilənmiş reklam kampaniyaları və təşviqedici tədbirlər vasitəsilə vəziyyəti stabilləşdirməyi hədəfləyir. Turizm sektoru ölkə iqtisadiyyatının mühüm sahələrindən biri sayıldığından, mövcud dinamikanın tezliklə dəyişməsi üçün hökumət səviyyəsində də dəstəyin artırılması gözlənilir.