İstanbulun Sirkeci məhəlləsində yerləşən və 1855-ci ildə Ömər Əfəndinin geyim mağazası kimi fəaliyyətə başlayan tarixi bina, Marriott International şəbəkəsinin yüksək seqmentli brendi olan Le Meridien Hotel adı ilə yenidən qonaqlarını qarşılayacaq.
Turizmplus.az Para jurnalına istinadən xəbər verir ki, bina keçmişdə Orosdi Back adı altında fəaliyyət göstərib, bir müddət isə Sümerbank mağazası kimi istifadə olunub. Tarixi tikilini 1998-ci ildə Cahit və Abdurrahim Balyen qardaşlarına məxsus Caba İnşaat şirkəti satın alıb.
Layihənin dizaynını isə daha əvvəl İTO-nun Liman Han və TOBB-un Galataport Otel layihələrini də hazırlayan Fatih Sönmez Mimarlık həyata keçirir.
Şirkət bundan əvvəl Taşyapı-nın sahibi Emrullah Turanlıya aid Kadıköy Modadakı oteli 66 milyon dollara almışdı. Bundan başqa, İraqın Ərbil şəhərindəki Dedeman, Diyarbakırdakı Radisson Blu və İstanbul Leventdəki Delta Hotels by Marriott da Caba İnşaatın portfelinə daxildir.
Marriott Group, Sheraton, Le Meridien, Westin, Autograph Collection, Tribute Portfolio və Delta Hotels by Marriott kimi brendləri Türkiyəyə gətirib. Qrup, ilin sonuna qədər ölkədəki otellərinin sayını 70-ə çatdırmağı planlaşdırır.