Booking.com-da şübhəli kiberhücum: bəzi istifadəçilərin məlumatlarına giriş mümkün olub

Booking.com platforması bəzi istifadəçilərin rezervasiya məlumatlarına icazəsiz üçüncü şəxslərin giriş əldə etmiş ola biləcəyi ilə bağlı şübhəli fəaliyyət aşkarladığını açıqlayıb.

Turizmplus.az xəbər verir ki, şirkət məsələ aşkar olunduqdan dərhal sonra problemi nəzarət altına almaq üçün tədbirlər gördüyünü bildirib. Bu çərçivədə müvafiq rezervasiyalar üzrə PIN kodları yenilənib və istifadəçilər məlumatlandırılıb.

Mərkəzi Amsterdam şəhərində yerləşən Booking.com dünya üzrə 30 milyondan çox yerləşmə obyektini siyahıya alır və milyonlarla istifadəçini səyahət xidmətləri ilə təmin edir. Şirkət hücumdan neçə nəfərin təsirləndiyini açıqlamayıb, lakin maliyyə məlumatlarına giriş olmadığını qeyd edib.

Məlumata görə, hakerlər bəzi istifadəçilərin əvvəlki rezervasiyalarına aid məlumatlara – rezervasiya detalları, ad-soyad, e-poçt ünvanı, telefon nömrəsi və yerləşmə obyektləri ilə paylaşılmış digər informasiyalara çıxış əldə etmiş ola bilər.

Qeyd edək ki, bu hadisə Booking.com platformasına qarşı son dövrlərdə artan kiberhücum cəhdlərinin növbəti nümunəsi kimi qiymətləndirilir. Şirkət onlayn fırıldaqçılıq hallarına qarşı mübarizəni gücləndirdiyini bildirib.