Payızda səyahət üçün ən uyğun istiqamətlər hansılardır? – MÜTƏXƏSSİS CAVABLANDIRIR
Payız mövsümü səyahət üçün ən əlverişli dövrlərdən biri hesab olunur. Yay aylarının izdihamından uzaqlaşmaq, daha sakit atmosferdə şəhərləri kəşf etmək, təbiətin rənglərini izləmək və yeni mədəniyyətlərlə tanış olmaq istəyənlər üçün dünyanın müxtəlif istiqamətləri fərqli imkanlar təqdim edir.
Turizmplus.az payız aylarında səyahət üçün daha çox seçilən istiqamətlər və bu səfərlərin insanın əhvalına təsiri barədə Baku Holiday Travel şirkətinin mütəxəssisi Şövqi Zeynalov ilə söhbətləşib.
Payızda hansı ölkələrə səyahət etmək insanı daha xoşbəxt edə bilər?
Payızda səyahət üçün seçim kifayət qədər genişdir. Düşünürəm ki, burada əsas məsələ insanın səyahətdən nə gözləməsidir. Təbiət, mədəniyyət, qastronomiya və ya sadəcə sakitlik axtaranlar üçün fərqli istiqamətlər mövcuddur.
Məsələn, Yaponiya payız rənglərini və fərqli mədəniyyəti yaşamaq istəyənlər üçün möhtəşəm seçimdir. Xüsusilə Kyoto və Tokyo payız aylarında tamamilə fərqli atmosfer yaradır. Təbiətin rəngləri ilə şəhər həyatının vəhdəti bu ölkəyə səyahəti daha da maraqlı edir.
İtaliya da payız üçün ən uğurlu istiqamətlərdəndir. Toskana, Roma və Florensiya bu mövsümdə daha sakit küçələri, xoş havası, möhtəşəm mətbəxi və gözəl payız mənzərələri ilə turistləri cəlb edir.
Təbiət və sakitlik axtaranlar üçün Sloveniya yaxşı seçim ola bilər. Dağlar, göllər və təbiət mənzərələri payızda xüsusi gözəllik qazanır. Xüsusilə Bled gölü bu mövsümdə fərqli mənzərə təqdim edir.
İsveçrə isə dağ mənzərələri, təmiz havası və sakit atmosferi ilə seçilir. Payız rəngləri ölkənin təbiətinə xüsusi gözəllik qatır və daha rahat istirahət etmək istəyənlər üçün uyğun seçimdir.
Azərbaycandan çox uzağa getmək istəməyənlər üçün isə Gürcüstan həmişə maraqlı alternativlərdən biridir. Yaxın olması, gözəl təbiəti, zəngin mətbəxi və nisbətən münasib büdcə ilə səyahət imkanının olması bu istiqaməti əlverişli edir. Xüsusilə Kaxeti payız aylarında özünəməxsus gözəlliyi ilə seçilir.
Yunanıstan da yay mövsümünün izdihamından uzaqlaşmaq istəyənlər üçün maraqlı seçimdir. Daha sakit atmosferdə şəhərləri və adaları kəşf etmək, yerli mətbəxi dadmaq və dincəlmək mümkündür.
Türkiyə isə həm qısa həftəsonu səfərləri, həm də daha uzun istirahət üçün geniş imkanlar təqdim edir. İstanbul, Kapadokya, Antalya və Egey bölgəsi payızda fərqli səyahət təcrübəsi yaşamaq istəyənlər üçün maraqlı istiqamətlərdir.
Bundan başqa, Portuqaliya da payız səyahətləri üçün uğurlu seçimlərdəndir. Lissabon və Porto şəhər gəzintiləri, yerli mətbəx və qastronomik təcrübələr baxımından turistlər üçün xüsusi maraq yaradır.
Avstriya isə xüsusilə romantik və sakit atmosfer axtaranların diqqətində ola bilər. Vyana, Salzburg və ətraf bölgələr payızda özünəməxsus görüntüyə bürünür.
Fransa da payızda fərqli təcrübə təqdim edir. Parisdən Bordoya qədər şəhər gəzintiləri, muzeylər, kafelər və qastronomiya ilə maraqlananlar üçün bu mövsüm kifayət qədər əlverişlidir.