Müharibənin Körfəz ölkələrinin turizm iqtisadiyyatına gündəlik zərəri nə qədərdir? – ARAŞDIRMA

Orta Şərqdə davam edən münaqişə regionun turizm sektoruna ciddi təsir göstərib. Mütəxəssislərin qiymətləndirməsinə görə, savaşın Körfəz ölkələrinin turizm iqtisadiyyatına gündəlik zərəri təxminən 600 milyon dollar təşkil edir.

Turizmplus.az “World Travel & Tourism Council”-a istinadən xəbər verir ki, bölgədə təhlükəsizlik narahatlıqları, hava məkanlarının bağlanması və çoxsaylı uçuşların ləğvi turizm axınına ciddi zərbə vurur.

Məlumatlara görə, qısamüddətli kirayə platformalarından toplanan statistikaya əsasən yalnız Dubayda martın 6-na qədər olan bir həftə ərzində 80 mindən çox qısamüddətli yerləşmə rezervasiyası ləğv edilib.

Ekspertlər qeyd edir ki, münaqişədən əvvəl WTTC bu il Orta Şərqdə beynəlxalq turistlərin təxminən 207 milyard dollar xərcləyəcəyini proqnozlaşdırırdı. Lakin hazırkı vəziyyət bu proqnozu ciddi risk altına qoyur.

Bununla yanaşı, uçuşların kütləvi şəkildə ləğvi də turizm hərəkətliliyinə təsir edib. Aviasiya məlumat şirkəti Cirium–un məlumatına görə, beş gün davam edən uçuş ləğvləri nəticəsində təxminən 4 milyon sərnişin regionda çətin vəziyyətdə qalıb.

Mütəxəssislər bildirir ki, gərginlik uzun sürərsə turistlər oxşar imkanlara malik alternativ istiqamətlərə üz tuta bilər. Bununla belə, analitiklər hesab edir ki, münaqişə başa çatdıqdan sonra regionun strateji mövqeyi və inkişaf etmiş turizm infrastrukturu sayəsində sektor yenidən bərpa oluna bilər.