Göydəniz Qəhrəmanov aviabiletlərin bahalığına diqqət çəkdi: Turizm sektoruna təsirlər müzakirə olundu

Azad Azərbaycan Televiziyası ilə Dövlət Vergi Xidmətinin birgə layihəsi olan “İqtisadi Zona” proqramında turizm sahəsində mövcud vəziyyət müzakirə edilib.

Turizmplus.az xəbər verir ki, proqramın qonağı olan millət vəkili Göydəniz Qəhrəmanov regionda baş verən hadisələrin turizm sektoruna təsirindən danışıb.

Deputat qeyd edib ki, Yaxın Şərqdə baş verən gərginlik, xüsusilə aviareyslərin təxirə salınması və bəzi hava limanlarının fəaliyyətini dayandırması turizm axınına birbaşa təsir göstərir.

O, çıxışı zamanı aviabiletlərin bahalığı məsələsinə xüsusi diqqət çəkərək, bunun həm xaricə səfər edən, həm də ölkəyə gələn turistlər üçün əsas maneələrdən biri olduğunu vurğulayıb. Bildirib ki, nəqliyyat xərclərinin yüksək olması turizm sektorunun rəqabət qabiliyyətini azaldır.

Millət vəkili həmçinin turizm axınının artırılması üçün bazarların şaxələndirilməsinin vacibliyini qeyd edib, yerli turizmin əlçatanlığının artırılması və xidmət keyfiyyətinin yüksəldilməsinin önəmini vurğulayıb.

Proqram çərçivəsində turizm sahəsində kadr hazırlığı, peşəkar bələdçilərin yetişdirilməsi və sektorun inkişaf perspektivləri də müzakirə olunub.