“Rixos Water World Aktau” hotelində çalışan həmyerlimiz – Orxan İsmayılovla MÜSAHİBƏ
Bu dəfə Turizmplus.az olaraq sizi turizm sahəsində uğurla fəaliyyət göstərən azərbaycanlı mütəxəssis — Orxan İsmayılov ilə tanış edirik. Artıq 7 ildir Qazaxıstanda yaşayan və çalışan Orxan bəy hazırda beynəlxalq “Rixos Hotels” şəbəkəsinə aid “Rixos Water World Aktau” hotelində “Food & Beverage” (Qida və İçki) əməliyyatları üzrə supervisor kimi fəaliyyət göstərir. O, həm peşəkar bacarıqları, həm də milli dəyərlərimizi xaricdə layiqincə təmsil etməsi ilə seçilir.
– Orxan bəy, ilk olaraq, sizi yaxından tanıyaq. Qazaxıstandakı fəaliyyətiniz haqqında qısa məlumat verərdiniz.
– Mən Orxan İsmayılov, azərbaycanlıyam və artıq 7 ildir ki, Qazaxıstanda yaşayıram və fəaliyyət göstərirəm. Turizm sahəsində çalışıram və hazırda Rixos Hotels şəbəkəsində Food & Beverage əməliyyatları üzrə supervisor kimi işləyirəm. Bu müddət ərzində həm peşəkar, həm də şəxsi inkişafıma daim diqqət yetirmişəm. Beynəlxalq standartlara uyğun xidmətin təşkili, komanda idarəçiliyi və qonaq məmnuniyyətinin yüksək səviyyədə qorunması əsas prioritetlərimdir.
– Xaricdə işləmək sizə hansı təcrübə və bacarıqları qazandırıb?
– Xaricdə fəaliyyət göstərmək mənə beynəlxalq standartlar çərçivəsində işləmək imkanı yaradıb. Xüsusilə multikultural mühitdə işləmək operativ qərarvermə və strateji yanaşma bacarıqlarımı əhəmiyyətli dərəcədə inkişaf etdirib. Müxtəlif millətlərdən olan qonaqların gözləntilərini anlamaq və onlara uyğun xidmət təqdim etmək bu sahədə ən böyük təcrübələrimdən biridir.
– İşlədiyiniz mühit və rəhbərlik sizin inkişafınıza necə təsir göstərib?
– Xüsusilə qeyd etmək istərdim ki, çalışdığım otelin müdiri İsagaliyev Serik bəyin rəhbərliyi altında xidmət keyfiyyəti, komanda idarəçiliyi və qonaq məmnuniyyəti sahəsində yüksək standartların tətbiqi gündəlik fəaliyyətimizin əsasını təşkil edir. Bu da mənim peşəkar inkişafıma ciddi töhfə verib. Belə bir mühitdə işləmək insanı daim inkişaf etməyə vadar edir.
– Qazaxıstan turizm bazarını Azərbaycandan fərqləndirən əsas məqamlar hansılardır?
– Qazaxıstan bazarını fərqləndirən əsas amillərdən biri beynəlxalq qonaq axınının daha intensiv olmasıdır. Eyni zamanda, burada xidmət sektorunda sistemli yanaşma geniş tətbiq olunur. Xidmətin sürəti, keyfiyyətin sabitliyi və detallara diqqət xüsusi önəm daşıyır. Bu yanaşma ümumilikdə xidmət səviyyəsini daha stabil və yüksək edir.
– Azərbaycanlı olaraq milli mətbəximizi və qonaqpərvərlik ənənələrimizi tanıtmaq imkanlarınız olubmu?
– Bəli, bu mənim üçün həm məsuliyyət, həm də qürur mənbəyidir. Rixos otellər şəbəkəsində çalışdığım müddət ərzində müxtəlif tədbirlər və xüsusi konseptlər çərçivəsində Azərbaycan mətbəxinin seçilən nümunələrinin təqdim olunmasında iştirak etmişəm. Bu təqdimatlar qonaqlar tərəfindən böyük maraqla qarşılanıb.
Bununla yanaşı, Azərbaycan xidmət mədəniyyətinə xas olan səmimiyyət, diqqət və incə yanaşma prinsiplərini komandamın iş üslubuna tətbiq etməyə çalışmışam. Bu yanaşma həm qonaq məmnuniyyətinə müsbət təsir göstərib, həm də xidmət keyfiyyətinin yüksəlməsinə şərait yaradıb.
– Sonda, turizm və hotelçilik sahəsində karyera qurmaq istəyən gənclərə nə tövsiyə edərdiniz?
– Bu sahədə uğur qazanmaq üçün ilk növbədə səbirli və məsuliyyətli olmaq lazımdır. Daim öyrənmək, öz üzərində işləmək və yeniliklərə açıq olmaq çox vacibdir. Xarici dilləri bilmək və beynəlxalq təcrübə qazanmaq isə böyük üstünlükdür. Ən əsası isə işinizi sevməkdir — çünki turizm sahəsi insanlarla işləməyi tələb edir və bu işi sevərək görmək uğurun əsas açarlarından biridir.