Azərbaycanda turizm sənayesi beynəlxalq səviyyədə tanınma və qiymətləndirmə baxımından mühüm nailiyyətlər əldə edib. Son dövrdə bir neçə hotel “Michelin Guide” tərəfindən “Michelin Key” mükafatına layiq görülüb.
Turizmplus.az xəbər verir ki, “Michelin Guide” dünyanın ən nüfuzlu qiymətləndirmə sistemlərindən biridir və burada hotellərin qiymətləndirilməsi yalnız komfort səviyyəsinə deyil, xidmət keyfiyyətinə, qonaqpərvərliyə və qonağın ümumi təcrübəsinə görə aparılır.
Bu çərçivədə Azərbaycandan üç hotel “Michelin Key” mükafatını qazanıb: Four Seasons Hotel Baku, The Ritz‑Carlton Baku və The Merchant Baku.
Bakıdakı Four Seasons Hotel iki Michelin Key mükafatına layiq görülüb. Bu nailiyyət ölkənin turizm potensialının və xidmət səviyyəsinin beynəlxalq standartlara uyğun olduğunu göstərir. Hotel həm yerli, həm də xarici qonaqlar üçün yüksək komfort və fərdi yanaşma ilə seçilir və bu, Michelin Guide tərəfindən yüksək qiymət alıb.
Dünyaca məşhur brendin Azərbaycan filialı olan The Ritz‑Carlton Baku bir “Michelin Key” qazanıb. Bu mükafat hotelin lüks seqmentdə göstərdiyi xidmət keyfiyyətini dəstəkləyir və ölkəmizin biznes və lüks turizm sahəsində nüfuzunu artırıb.
Boutique otel kateqoriyasında fəaliyyət göstərən The Merchant Baku də “Michelin Guide” tərəfindən bir “Michelin Key” ilə qiymətləndirilib. Bu, kiçik ölçülü, lakin fərdi və diqqətcil xidmət göstərən otellərin də beynəlxalq səviyyədə tanındığını göstərən nümunədir.
Ümumilikdə Michelin Key mükafatları Azərbaycanda hotellərin yalnız fiziki imkanlarının yüksək səviyyədə olmasını deyil, həm də göstərilən xidmətin keyfiyyətcə beynəlxalq standartlara uyğun olduğunu təsdiqləyir. Bu mükafatlar ölkəmizin turizm sənayesinin beynəlxalq reytinqlərdə daha da artmasına və daha çox qlobal səyahətçinin Azərbaycanı seçməsinə təkan verir.