Bakı və region hotelçiləri mövsümü necə dəyərləndirir? – HOTELÇİLƏR DANIŞIR
Turizmplus.az olaraq, turizm sahəsində fəaliyyət göstərən peşəkarları bir araya gətirmək və onların səsini oxucularımıza çatdırmaq məqsədilə yeni bir silsiləyə start veririk. “Turizmçilər Danışır” rubrikasının davamı olaraq təqdim etdiyimiz “Hotelçilər Danışır” bölməsində həm Bakıda, həm də regionlarda fəaliyyət göstərən hotellərin nümayəndələri ilə maraqlı müsahibələr təqdim edəcəyik.
Bu rubrikada hotellərin inkişaf strategiyaları, xidmət keyfiyyətinin yüksəldilməsi, qonaq məmnuniyyəti, turizm sektorunun çağırışları və gələcək planları barədə dəyərli fikirlərə yer veriləcək. Məqsədimiz həm sahə mütəxəssislərinə, həm də oxucularımıza faydalı olacaq praktik biliklər və maraqlı baxış bucaqları təqdim etməkdir.
İlk müsahibəmiz isə “Shirvan Grand Hotel Shamakhi”nin Baş meneceri Natiq İslamov və “Duru Hospitality Management”in idarəçiliyində fəaliyyət göstərən “Qafqaz Sahil Hotel Baku”nun Baş meneceri Elgün Bayramov ilə baş tutub. Onlar mövsüm ərzində Bakı və region hotellərində doluluq səviyyəsi və ümumi vəziyyətin qiymətləndirilməsi barədə fikirlərini bölüşüblər.
“Duru Hospitality Management”in idarəçiliyində fəaliyyət göstərən “Qafqaz Sahil Hotel Baku”nun Baş meneceri Elgün Bayramov:
“Yay mövsümü Bakı üçün istədiyimiz kimi keçmədi. Əslində planlaşdırılan doluluq orta hesabla 70 faiz idi, amma buna nail ola bilmədik.
Bunun bir neçə əsas səbəbi var idi. İlk növbədə, Hindistan ilə Pakistan arasında yaşanan gərginlik nəticəsində yaranan baykot turizmə mənfi təsir göstərdi. Digər mühüm amil isə İsrail-İran müharibəsi oldu.
Bununla belə, bəzi hadisələr otellərin doluluğuna müsbət təsir göstərdi. Məsələn, Bakıda təşkil olunan Justin Timberlake konserti şəhərə böyük turist axını gətirdi. Bundan əlavə, İran sərhədində qalan Çin və Rusiya vətəndaşları hotelimizdə məskunlaşdılar. Eləcə də, Bakıdan uça bilməyən İsrail vətəndaşlarının bizim hotelə yerləşməsi doluluğa təsir göstərdi. Şübhəsiz ki, Formula yarışları da bu baxımdan önəmli rol oynadı.
Hazırda isə müsbət bir dinamika hiss olunur. ABŞ-da keçirilən Azərbaycanla bağlı görüşdən sonra Hindistanın tətbiq etdiyi baykotların aradan qaldırılması ehtimalı güclənib və bunun təsiri artıq yavaş-yavaş özünü göstərir.”
“Shirvan Grand Hotel Shamakhi”nin Baş meneceri Natiq İslamov:
“Bu mövsüm Şamaxı və ümumilikdə region hotellərində turist sayı əvvəlki illərlə müqayisədə daha stabil və qənaətbəxş olmuşdur. Yay aylarında, xüsusilə iyul–avqust dövründə həm daxili, həm də xarici qonaqların sayında nəzərəçarpacaq artım qeydə alındı. Həftəsonları doluluq səviyyəsi demək olar ki, maksimum həddə yaxınlaşırdı. Bu, bir daha göstərir ki, vətəndaşlarımız regionlarda istirahətə üstünlük verir, xarici qonaqlar isə Azərbaycanın mərkəzi bölgələrini kəşf etməyə maraq göstərirlər.
Builki mövsümdə hotellərin xidmət keyfiyyətinin yüksəlməsi və yeni istirahət məkanlarının istifadəyə verilməsi də doluluq göstəricilərinə müsbət təsir göstərmişdir. Mən mövsümü ümumilikdə müsbət dəyərləndirirəm. Şamaxı regionu həm iqlim, həm də coğrafi mövqeyinə görə çox əlverişli bir istiqamətdir. Paytaxta yaxın olması, eyni zamanda təbiətinin və tarixi irsinin zənginliyi turistlərin seçimində mühüm rol oynayır. Builki mövsümdə biz bunun bariz nümunəsini gördük – ailəvi istirahət üçün gələn qonaqlar, fərdi turistlər və hətta beynəlxalq qonaqlar arasında maraq artmışdır.
Xüsusi olaraq vurğulamaq istərdim ki, low season – yəni mövsümdənkənar dövr üçün də Şamaxı regionunun potensialı çox böyükdür. Əgər yay və bayram dövrlərində əsas üstünlük istirahət və turizmə verilmirsə, payız və qış aylarında da burada çoxşaxəli imkanlar mövcuddur: təbiətlə təmasda sakit istirahət, spa və sağlamlıq xidmətləri, korporativ tədbirlər, seminar və konfransların keçirilməsi üçün əlverişli şərait mövcuddur.
Doğru marketinq yanaşması və hədəfli təkliflər paketi ilə biz bu dövrlərdə də yüksək doluluq göstəricilərinə nail ola bilərik. Beləliklə, region hotellərinin fəaliyyəti yalnız mövsümi deyil, il ərzində davamlı şəkildə inkişaf etdirilə bilər.”