Yaxın Şərqdə davam edən gərginlik qlobal aviasiya bazarına ciddi təsir göstərərək aviabiletlərin qiymətlərində kəskin artıma səbəb olub.
Turizmplus.az xəbər verir ki, bəzi marşrutlar üzrə bilet qiymətləri 560%-ə qədər artıb, xüsusilə Asiya–Avropa istiqamətində bu artım daha çox hiss olunur.
Məlumatlara görə, qiymət artımının əsas səbəbləri arasında uçuşların ləğvi, hava məkanlarının bağlanması və yanacaq xərclərinin yüksəlməsi yer alır. Alton Aviation Consultancy tərəfindən açıqlanan statistikaya əsasən, bəzi əsas marşrutlarda qiymətlər ötən illə müqayisədə demək olar ki, iki dəfə artıb.
Ekspertlər bildirir ki, xüsusilə Körfəz regionunda yaranmış vəziyyət tranzit uçuşlara birbaşa təsir edir. Bu isə uçuş marşrutlarının dəyişməsinə və əlavə xərclərin yaranmasına səbəb olur.
Bununla yanaşı, artan qiymətlər və qeyri-müəyyənlik sərnişin tələbinə də təsir edib. Avropa–ABŞ və Asiya–Avropa istiqamətlərində rezervasiyalarda azalma müşahidə olunur.
Mütəxəssislərin fikrincə, mövcud vəziyyət fonunda aviabiletlərin qiymətlərinin qısa müddətdə enməsi gözlənilmir. Hətta gərginlik azalsa belə, qiymətlərin əvvəlki səviyyəyə qayıtması üçün müəyyən zaman tələb olunacaq.