Hazırkı vəziyyət və bir neçə ölkənin hava məkanının bağlanması səbəbindən BƏƏ-yə və BƏƏ-dən həyata keçirilən bir sıra Air Arabia uçuşları müvəqqəti olaraq ləğv edilib.
Turizmplus.az xəbər verir ki, Şarja–Bakı–Şarja istiqamətində həyata keçirilən G9300/301 və G9305/306 saylı reyslər 22 mart 2026-cı il tarixinədək yerinə yetirilməyəcək.
Şirkətin Azərbaycan nümayəndəliyi bildirib ki, daha əvvəl açıqlanan bilet dəyişdirmə və ləğv qaydaları qüvvədə qalır. Sərnişinlər bilet tarixlərini AccellAero sistemi vasitəsilə agentlik girişləri ilə dəyişə bilərlər. Ləğv edilmiş biletlərin geri qaytarılması üçün isə azsales@airarabia.com elektron poçt ünvanına müraciət etmək tələb olunur.
Qrup rezervasiyası olan agentliklərdən aviaşirkətlə birbaşa əlaqə saxlamaları xahiş olunur. Eyni zamanda agentliklərə rezervasiya sistemini mütəmadi izləyərək uçuşlarla bağlı yenilikləri sərnişinlərə operativ şəkildə çatdırmaq tövsiyə edilib.
Aviaşirkət həmçinin qeyd edib ki, hazırda zənglər, e-maillər və digər kommunikasiya kanalları üzrə müraciətlərin sayı yüksəkdir. Sərnişinlərdən uçuşların statusunu rəsmi veb-sayt vasitəsilə də yoxlamaq xahiş olunur.