Şengen ölkələrinə girişdə YENİ QAYDALAR: uzun növbələrə və gözləmələrə hazır olun
Avropa İttifaqının yeni Giriş/Çıxış Sistemi (EES) tam şəkildə tətbiq olunmağa başlayır və bu, hava limanlarında ciddi gecikmələrə səbəb ola bilər.
Turizmplus.az xəbər verir ki, 2025-ci ilin oktyabrından mərhələli şəkildə tətbiq edilən Entry/Exit System (EES) 10 aprel 2026-cı il tarixindən etibarən bütün Şengen ölkələrində tam gücü ilə işə düşəcək.
Yeni qaydalara əsasən, AB vətəndaşı olmayan sərnişinlər pasport nəzarəti zamanı barmaq izi təqdim etməli və biometrik foto çəkdirməlidirlər. Bu isə xüsusilə sıx hava limanlarında növbələrin uzanmasına və gözləmə müddətinin 3–5 saata qədər artmasına səbəb olur.
Məlumata görə, sistem sərnişinlərin biometrik məlumatlarını toplayaraq 3 il müddətində saxlayır və Şengen zonasına giriş-çıxışlara nəzarəti gücləndirməyi hədəfləyir.
Bununla belə, Airports Council International (ACI) məlumatına əsasən, EES tətbiq edilən sərhəd-keçid məntəqələrində əməliyyat müddəti 70%-ə qədər artıb. Cenevrə və Lissabon kimi hava limanlarında gözləmə müddəti artıq bir neçə saatı keçir və bəzi sərnişinlər uçuşlarını qaçırır.
Mütəxəssislər sərnişinlərə:
- Hava limanına daha erkən gəlməyi
- Pasport nəzarəti üçün ən azı əlavə 4 saat vaxt ayırmağı
- Münhen, Frankfurt və Paris kimi böyük tranzit mərkəzlərində 3–4 saatlıq transfer planlamağı tövsiyə edirlər
Qeyd olunur ki, yay mövsümü və bayram günlərində hava limanlarında sıxlığın daha da artacağı gözlənilir.
Bununla yanaşı, ikiqat vətəndaşlığı olan şəxslər AB pasportu ilə səyahət etdikdə bu prosesdən təsirlənmirlər.