Parisdə Sena çayında çimməyə rəsmi icazə verildi – 100 ildən sonra ilk dəfə

Paris şəhərində 1923-cü ildən bəri ilk dəfə olaraq Sena çayında ictimai şəkildə çimməyə rəsmi icazə verilib. Bu qərar Fransa paytaxtının 2024 Yay Olimpiya Oyunlarına hazırlığı çərçivəsində həyata keçirilən iri infrastruktur və ekoloji təmizləmə layihələrinin nəticəsidir.

Turizmplus.az xəbər verir ki, Fransa hökuməti və Paris meriyası tərəfindən həyata keçirilən 1,4 milyard avroluq proqram nəticəsində Sena çayının suyu təmizlənib və bir neçə zonada üzgüçülük üçün şərait yaradılıb. İyulun əvvəlindən etibarən şəhərin üç əsas hissəsində – Bras Marie, Grenelle və Quai de Bercy bölgələrində çimmək mümkün olub.

Çayda çimmək üçün xüsusi zonalarda aşağıdakı şərait təmin olunub:

• Duş və geyinmə kabinələri

• Canqurtaran xidməti

• Su keyfiyyətinə gündəlik nəzarət

Hər gün suların bakterioloji analizi aparılır və nəticələrə əsasən ictimaiyyətə məlumat verilir. Lazım gəldikdə təhlükə yaradan şəraitdə həmin gün üçün üzgüçülük zonaları bağlanır.

Qeyd edək ki, bu addım Parisin “yaşıl şəhər” strategiyasının bir hissəsidir və növbəti illərdə çay boyunca daha çox ictimai məkana çevriləcək sahələrin yaradılması planlaşdırılır.