Azərbaycan-Çin turizm əlaqələri yerli turizmin inkişafına nə vəd edir? – TURİZMÇİLƏR DANIŞIR
Avqustun 27-də ölkəmizdə “China Ready” proqramının təqdimatı keçirilib. Layihənin əsas məqsədi Azərbaycanı çinli turistlərin üstünlük verdiyi istiqamətlərdən birinə çevirmək, eləcə də yerli turizm sənayesinin Çindən gələn səyahətçiləri qarşılamağa və onlara yüksək səviyyədə xidmət göstərməyə hazırlığını təmin etməkdir.
Turizmplus.az olaraq biz də mövzunun aktuallığını nəzərə alaraq turizm mütəxəssislərinin rəylərini öyrəndik. Mütəxəssislər “China Ready” proqramının Azərbaycanın turizm bazarına təsiri, eləcə də Azərbaycan-Çin turizm əlaqələrinin ölkə iqtisadiyyatı və yerli turizm sektoru üçün yaradacağı imkanlar barədə fikirlərini bölüşdülər.
“Green Apple MICE & Leisure Travel” şirkətinin İcraçı direktoru Cəmilə Əliyeva:
Azərbaycan-Çin turizm əlaqələrinin gələcəyi yerli turizmin inkişafı üçün iri miqyaslı və çox mühüm imkanlar vəd edir. Hamımıza məlumdur ki,
Çin dünyanın ən çox səyahət edən turistlərinə malik ölkəsidir. Azərbaycan turizm sənayesi olaraq bu potensialı cəlb edə bilsək, illik gələn turist sayında ciddi artım müşahidə edəcəyik.
Bu turizm infrastrukturunun təkmilləşdirilməsi üçün də çox əsaslı şərait yaradacaqdır. Çinli turistlərin ehtiyac və gözləntilərinə uyğun xidmətlər qurmaq – dil baryerini azaltmaq, menyuları uyğunlaşdırmaq, Çin mədəniyyətinə uyğun xidmət standartlarını tətbiq etmək – ümumi keyfiyyətin artmasına səbəb olacaq.
Turist axınının artması otellər, restoranlar, nəqliyyat və ekskursiya xidmətləri üçün yeni iş yerləri və gəlir imkanları yaradacaq, yerli iqtisadiyyat canlanacaqdır.
Çinli turistlər sosial mediada və səyahət platformalarında təəssüratlarını bölüşməklə Azərbaycanın tanıdılmasına ciddi töhfə verə bilərlər. Bu da Azərbaycana brendinin tanınmasında yeni mərhələ açacaqdır.
Mədəniyyətlərarası dialoqun dərinləşməsi ilə möhkəmlənən bu növ əlaqələr sadəcə iqtisadi deyil, eyni zamanda mədəni yaxınlaşmanı da təşviq edir. Bu isə uzunmüddətli əməkdaşlıqlar üçün zəmin yaradır.
Yekunda demək istərdim ki, düzgün yanaşma və strategiya ilə Azərbaycan Çin turistləri üçün cəlbedici və daimi istiqamətə çevrilə bilər, bu da yerli turizmin keyfiyyət və miqyas baxımından yeni mərhələyə keçməsinə səbəb olar. Çin bazarından gözləntilərimiz böyükdür və bu çalışmalar istər dövlət strukturları, istərsə də özəl sektor tərəfindən olduqca qənaətbəxşdir.
“Bee Tours” şirkətinin rəhbəri Azər Hüseynov:
Bee Tours olaraq biz bir neçə ildir ki, Çindən turist cəlb etmək məqsədilə beynəlxalq sərgilərdə və road show-larda iştirak edir, həmçinin fərdi səfərlər edərək əməkdaşlıqlar qurmağa çalışırdıq. Lakin etiraf etməliyəm ki, dünən keçirilən “China Ready” təqdimatı indiyə qədər Çinlə bağlı təşkil olunmuş ən faydalı tədbir oldu. Burada həm yeni biliklər qazandıq, həm də gələcək fəaliyyətimiz üçün daha düzgün istiqamətləri müəyyənləşdirmək imkanı əldə etdik. Bu təşəbbüsə görə Azərbaycan Turizm Agentliyinə və Turizm Bürosuna təşəkkür edirəm.
Əminəm ki, bu cür tədbirlər yerli turizm şirkətlərinə daha məqsədyönlü planlar qurmağa, eləcə də Azərbaycanın Çin bazarında mövqeyini gücləndirməyə mühüm töhfə verəcək. Bununla yanaşı, real nəticələrin əldə olunması üçün uçuş imkanlarının genişləndirilməsi vacibdir. Hazırda yalnız Pekindən həftədə üç dəfə reys mövcuddur ki, bu da Çinin böyük turizm potensialını nəzərə aldıqda kifayət deyil. Ümid edirik ki, yaxın gələcəkdə Şanxay, Quanqzou və Çengdu kimi şəhərlərdən də birbaşa uçuşlar açılacaq. Azərbaycan Hava Yollarının limitli təyyarə parkını nəzərə alsaq, bu prosesdə Çinli aviaşirkətlərin əməkdaşlığa cəlb olunması xüsusi əhəmiyyət daşıyır.
“Baku Holiday Travel” şirkətinin Direktor müavini Nurlan Səfərli:
Azərbaycan Turizm Bürosunun təşkilatçılığı ilə, 27 avqust 2025-ci il tarixində keçirilən “China Ready” proqramı yerli turizm mütəxəssisləri üçün son dərəcə dəyərli və maarifləndirici bir təcrübə oldu. Təlim zamanı Çinli turistlərin səyahət davranışları, mədəniyyət fərqlilikləri və gözləntiləri barədə ətraflı və praktik məlumatların paylaşılması, iştirakçılara bu bazarı daha dərindən anlamaq imkanı verdi.
Proqram çərçivəsində təqdim olunan məqsədyönlü tövsiyələr və real nümunələr, yerli turizm sektorunun Çin bazarına daha səmərəli şəkildə hazırlaşmasına ciddi dəstək verdi. Bu təşəbbüs, Azərbaycan turizminin Çin kimi geniş potensiala malik bir bazara açılması istiqamətində mühüm addım olmaqla yanaşı, ölkəmizin beynəlxalq turizm mühitində rəqabət qabiliyyətini də gücləndirir.
Azərbaycan Turizm Bürosunun bu kimi təşəbbüsləri davamlı xarakter daşıdıqca, həm yerli turizm sənayesinin inkişafına, həm də Azərbaycanın qlobal turizm xəritəsində daha güclü və tanınan bir istiqamətə çevrilməsinə mühüm töhfə verəcəkdir.