ATAA İdarə Heyəti toplandı: CARİ MƏSƏLƏLƏR MÜZAKİRƏ EDİLİB
Azərbaycan Turizm Agentlikləri Assosiasiyasının İdarə Heyətinin növbəti toplantısı keçirilib.
Təşkilatdan Turizmplus.az saytına verilən xəbərə görə, Azərbaycan Turizm Agentlikləri Assosiasiyasının yeni ünvanında baş tutan görüşdə Assosiasiyanın İdarə Heyətinin sədri Göydəniz Qəhrəmanov yay mövsümü ərzində ATAA və tabeliyində fəaliyyət göstərən komitə və komissiyalar tərəfindən həyata keçirilən işlər barədə məlumat verib.
İclasda yay mövsümündə turoperator və turagentliklər, bununla yanaşı hotellərlə agentliklər arasında yaşanan çətinliklər, bələdçilik fəaliyyətində baş verən nöqsanlar, o cümlədən nəqliyyat sektorunda turistlərin və nəqliyyatçıların üzləşdikləri problemlər və həlli yolları, yerli və beynəlxalq hava yolları şirkətləri ilə əməkdaşlıq əlaqələrinin genişləndirilməsi məsələləri müzakirə olunub.
Toplantıda Göydəniz Qəhrəmanov həmçinin turoperatorların risklərinin azaldılması, paytaxt ərazisində turizm yönümlü nəqliyyatçıların parklanma ilə bağlı çətinilklərinin aradan qaldırılması istiqamətində təkliflərin hazırlanaraq aidiyyatı dövlət qurumlarına göndərilməsinin nəzərdə tutulduğunu birdirib.
İclas çərçivəsində həmçinin yerli və xarici infoturların təşkili, Qarabağa ATAA üzvləri üçün səfərlərin sayının artırılması müzakirə olunub.
Toplantının sonunda Assosiasiyaya ünvanlanan yeni üzvlük müraciətlərinə baxılıb. İdarə Heyəti tərəfindən aparılan müzakirələrin nəticəsinə uyğun olaraq 24 şirkətdən 19-nun müraciətinə müsbət qərar verilib.
Qeyd edək ki, artıq Azərbaycan Turizm Agentlikləri Assosiasiyası yeni ünvanda- Bəşir Səfəroğlu küçəsi 123, Old Town Plaza, 10-cu mərtəbə, 1006-cı ofis-də yerləşir.
