ABŞ hökuməti bu tarixdən etibarən viza rüsumlarını ARTIRIR
ABŞ hökuməti beynəlxalq turistlər üçün viza haqlarında əhəmiyyətli artıma gedib.
Turizmplus.az businessinsider.com-a istinadən xəbər verir ki, 2025-ci ilin oktyabrından etibarən qüvvəyə minəcək yeni qərara əsasən, turist vizaları üçün ümumi ödəniş 185 dollardan 435 dollara yüksəldiləcək. Bu artım “Visa Integrity Fee” adlı yeni 250 dollarlıq haqqın əlavə olunması ilə əlaqədardır.
Bundan əlavə, Visa Waiver proqramına daxil olan ölkələrin vətəndaşlarının istifadə etdiyi ESTA icazəsi də 21 dollardan 40 dollara qaldırılıb.
Rəsmi açıqlamalarda bildirilir ki, bu əlavə haqlar ABŞ xəzinədarlığına yönəldiləcək və səyahətçi davranışlarını tənzimləməyə xidmət edəcək. Yeni sistem 1 oktyabr 2025-ci ildən etibarən tətbiq olunacaq və illik inflyasiyaya əsasən yenilənəcək.
Ekspertlərin fikrincə, bu qərar beynəlxalq turist axınına mənfi təsir göstərə bilər. Artıq 2025-ci ilin ilk yarısında ABŞ-a səfər edən əcnəbi turistlərin sayında 6-11% azalma müşahidə olunub. Səyahət agentlikləri və aviaşirkətlər bu qərarın turizmə olan tələbatı zəiflədə biləcəyindən narahatdırlar.