Şimal-qərb turizm marşrutu üzrə səfərimizin növbəti gününü Şəkiyə həsr etdik. Son dəfə bir neçə il öncə olduğum bu istiqamət müsbət mənada dəyişib. Müasirliklə tarixin vəhdətini daşıyan bu şəhərdə karvansaray divarlarının yanında «illy» kofesini qurtumladan avstriyalı cütlükləri görmək ürəyimi xeyli açdı. Turist qrupları var idi və daha çox olmasını arzu edirəm. Şəki səfərimizdə aşağıdakı məkanlarda olduq:
– DTA tabeliyində “Yuxarı Baş Dövlət Tarix-Memarlıq Qoruğu” ərazisində yerləşən XIX əsrə aid əsgər kazarması indi Şəki Dövlət Rəsm Qaleriyası adlanır və müasir tərzdə təmir edilib. Maraqlı fotosərgi var idi və giriş cəmi 2 AZN təşkil edir. Çıxışda rəsminizi müxtəlif üsullarda çəkmək üçün rəssama da müraciət edə bilərsiniz.
– Daha sonra sənətkarların əl işlərinin nümayiş olunduğu hissədə Milli Mətbəx Muzeyində oldu. Giriş 1 AZN-dir və təkidlə deyirəm ki, mütləq baş çəkin. Həm ona görə ki, unikaldır həm də muzeylərə, teatra, mədəni abidələrə az da olsa xeyir vermək hər məsuliyyətli vətəndaş üçün borcudur.
– Qədim Şəkinin mərkəzi ilə yuxarı addımlayıb V-VI əsrlərdə tikilmiş Dairəvi Məbədin yanı ilə Şəki Xan Sarayına qalxdıq. Şəki “ABAD” Keramika və Tətbiqi Sənət Mərkəzinə baş çəkib çar dövründə tikilən, hazırda “Şəbəkə evi” emalatxanası kimi istifadə edilən binanın həndəvərindən keçib getdik piti yeməyə. “ABAD” Keramika və Tətbiqi Sənət Mərkəzinin divarlarında işləmələr mükəmməl idi, oradan keçsəniz mütləq baxın.
– Şəkinin olmazsa olmazı pitini (piti, ağ xiyar turşusu, pomidor-xiyar, sumaqlı qırmızı soğan) Çələbi Xan restoranında cana ötürdük.
– Yenidən Qədim Şəki ətrafına geri dönüb Yuxarı Karvansaray və Miniatür Muzeyini gəzdik. Bu Muzeydə qədim Şəkinin bütün tarixi memarlıq abidələri və relyefi sərgilənir, haqqında maraqlı məlumatlar verilir.
– Sonda isə Şəki rayonunun Kiş kəndi ərazisində yerləşən Kiş Alban xristian məbədini ziyarət etdik. Bu məqamda diqqətli olun: Məbədə qalxan yollar olduqca dardır və iki maşın keçəsi olsa dayanmalar olur. Əgər, mənim kimi səbriniz çatmırsa qətiyyən avtomobiliniz ilə getməyin, taksi ilə qalxın. Giriş 2 AZN-dir və düzü, Şəkiyə səfər zamanı görülməli yerlərdən biridir.
