Misirdə piramidalar ətrafında turizm problemləri: TURİSTLƏR NARAZIDIR

Misirin ən məşhur turizm obyektlərindən olan Qiza Piramidaları son vaxtlar turistlər üçün müxtəlif çətinliklərlə gündəmə gəlib. Həm yerli, həm də xarici səyyahlar bölgədə artan sui-istifadə halları, təhlükəsizlik çatışmazlıqları və infrastruktura dair narahatlıqlar səbəbindən narazılıqlarını bildirirlər.

Turizmplus.az xəbər verir ki, turistlərin bildirdiyinə görə, piramidalar ətrafında fəaliyyət göstərən qeyri-rəsmi bələdçilər, dəvə və at turlarını təmin edən şəxslər tərəfindən aldanmaq və ya yüksək qiymətlərlə üzləşmək halları artıb. Bəzi hallarda turistlər zorla xidmət almağa məcbur edildiklərini və təhlükəli situasiyalara düşdüklərini iddia ediblər.

Bundan əlavə, turizm obyektləri ətrafında təmizlik, dayanacaq və sanitar qovşaqların olmaması, eləcə də bələdçi xidmətlərinin keyfiyyətsizliyi də turist təcrübəsini mənfi təsirləndirir.

Misirin Turizm və Antik Əsərlər Nazirliyi məsələ ilə bağlı açıqlamasında bildirib ki, piramidalar ətrafında turizm təcrübəsini yaxşılaşdırmaq üçün yeni nəzarət və lisenziya sistemi hazırlanır. Məqsəd qeyri-qanuni fəaliyyətlərin qarşısını almaq və turistlərin təhlükəsizliyini təmin etməkdir.

Qeyd edək ki, Qiza Piramidaları hər il milyonlarla turisti cəlb edir və ölkənin əsas iqtisadi gəlir mənbələrindən biri hesab olunur.