Londonda “VAT-free”nin ləğvi turistlərin alış-veriş səyahətlərinə mənfi təsir göstərir

Londonda son illərdə turizm sahəsində diqqətçəkən maliyyə itkisi qeydə alınıb. Vergisiz (VAT-free) alış-veriş imkanının ləğv edilməsi nəticəsində 2025-ci ilin ilk altı ayında şəhərin məşhur West End bölgəsində ticarət dövriyyəsi 310 milyon funt sterlinq azalıb. Bu, ötən ilin eyni dövründəki 220 milyon funt göstəricisi ilə müqayisədə daha kəskin geriləmə deməkdir.

Turizmplus.az xəbər verir ki, əsas zərbə Böyük Britaniyaya səyahət edən xarici turistlərin istehlak xərclərinə dəyib. Əvvəllər turistlər Londonu yüksəkkeyfiyyətli alış-veriş mərkəzləri və lüks brendləri ilə seçilən unikal məkan kimi görürdülər. Vergi güzəştlərinin aradan qaldırılması isə alış-veriş məqsədli səyahətlərin bir hissəsinin Paris, Milan və Dubay kimi rəqib istiqamətlərə yönəlməsinə səbəb olub.

West End Assosiasiyasının məlumatına görə, satışların azalması yalnız iqtisadi mənfəət itkisi ilə məhdudlaşmır. Bu proses eyni zamanda minlərlə iş yerinin ixtisarı və investisiya axınlarının zəifləməsi ilə müşahidə olunur. Sahibkarlar bildirirlər ki, vergisiz alış-verişin olmaması Böyük Londonu digər qlobal alış-veriş mərkəzləri ilə rəqabətdə zəif mövqeyə salır.

Ekspertlərin fikrincə, turistlərin istehlak davranışlarında müşahidə olunan bu dəyişiklik uzunmüddətli perspektivdə Londona gələn səyahətçi sayına da təsir edə bilər. Çünki yüksək xərcli turistlərin böyük bir hissəsi alış-veriş imkanlarını səyahət planlamasında əsas meyar kimi seçir.

Beləliklə, vergisiz alış-veriş siyasətinin bərpası məsələsi hazırda həm iş adamlarının, həm də turizm sektorunun əsas müzakirə mövzularından biridir. Əks halda, Londonun Avropanın aparıcı alış-veriş paytaxtı statusunu saxlamaq imkanları sual altına düşə bilər.