BMT: 2025-ci ildə beynəlxalq turizm gəlirləri 2019-cu ili ötəcək

Birləşmiş Millətlər Təşkilatının Dünya Turizm Təşkilatı (UNWTO) yeni hesabatında bildirib ki, 2025-ci ilin sonuna qədər beynəlxalq turizm gəlirləri pandemiyadan əvvəlki dövrü – 2019-cu ili geridə qoyacaq. Proqnozlara əsasən, bu il qlobal turizm gəlirləri 1.7 trilyon ABŞ dollarını keçəcək ki, bu da 2019-cu ilin göstəricisindən təxminən 5% yüksək deməkdir.

Turizmplus.az xəbər verir ki, hesabatda görə, turizm sənayesinin sürətli bərpasında rəqəmsallaşma, davamlı turizmə keçid, eləcə də regionlararası səyahətlərin artması əsas rol oynayıb.

UNWTO baş katibi Zurab Pololikaşvili çıxışında vurğulayıb ki, xüsusilə Asiya, Afrika və Latın Amerikası kimi inkişaf etməkdə olan bölgələrdə turist axını əhəmiyyətli dərəcədə artıb:

“Dünya turizmi pandemiyanın təsirlərindən güclənmiş şəkildə çıxır. Turizm təkcə iqtisadi deyil, həm də sosial və mədəni dirçəlişin aparıcı qüvvəsinə çevrilir.”

Hesabata görə, 2025-ci ildə ən çox gəlir əldə edən ölkələr sırasında Fransa, ABŞ, İspaniya, Çin və BƏƏ yer alacaq. Xüsusilə Orta Şərq və Cənub-Şərqi Asiya regionları turizm investisiyalarında rekord artım nümayiş etdirib.

Qeyd edək ki, 2020-2022-ci illərdə pandemiya səbəbindən beynəlxalq turizm gəlirləri kəskin şəkildə azalmışdı. 2025-ci ilin nəticələri isə sənayenin tam bərpa olunduğunu və yeni mərhələyə qədəm qoyduğunu göstərir.