Azərbaycan “Amadeus” rezervasiyaları üzrə Avropa bazarına liderlik edir

Səyahət texnologiyaları sahəsində aparıcı şirkət olan Amadeus və BMT-nin Turizm Təşkilatı (UN Tourism) Avropa üzrə səyahətlərə dair əhatəli məlumatları özündə əks etdirən yeni bir hesabat dərc edib. “Travel Insights 2025 – Focus on Europe” adlı hesabatda 2024-cü ilin may ayından 2025-ci ilin aprel ayınadək dövr üzrə sərnişin axını və tutum trendləri araşdırılıb, 2025-ci ilin oktyabrınadək proqnozlar təqdim olunub. Bu analizlər Amadeus-un Navigator360™ platformasından əldə olunmuş məlumatlara əsaslanır.

Hesabatda qeyd olunur ki, 2025-ci ilin aprel-oktyabr aylarında Avropaya hava sərnişin axını illik 6.7% artacaq – bu isə Avropaya olan marağın qlobal miqyasda davam etdiyini göstərir.

Qərbi və Mərkəzi Asiyada yerləşən bir sıra yeni istiqamətlər beynəlxalq səyahətçilərin diqqətini cəlb edir. Səyahətçilər getdikcə daha fərqli və maarifləndirici təcrübələrə üstünlük verirlər.

Avropada ən çox artım müşahidə olunan ilk 10 istiqamət arasında:

• Azərbaycan liderlik edir – hava bileti rezervasiyaları 26% artıb (2023-cü ilin mayından 2024-cü ilin aprel ayına olan dövrlə müqayisədə).

• Qazaxıstan – 7% artım,

• Çex Respublikası – 6% artım,

• Özbəkistan – 4% artım müşahidə olunub.

Bununla yanaşı, Norveç (39%) və Gürcüstan (33%) axtarış artımında ön plandadır, lakin bu ölkələrə rezervasiyalarda artım daha mülayim olub.

Ənənəvi İstiqamətlər Hələ də Liderdir

Bununla belə, Avropada səyahət edənlərin 70.9%-i İspaniya, Böyük Britaniya, İtaliya, Fransa və Almaniya kimi ən çox bron edilən klassik istiqamətlərə üstünlük verirlər.

Eyni zamanda, Birləşmiş Ştatlar, Böyük Britaniya və Almaniya kimi ölkələr güclü daxil olan (inbound) sərnişin axını yaratmağa davam edir.

Qazaxıstandan Avropaya səyahətlər 5% artım göstərib – bu ölkə ən çox artım müşahidə olunan ilk 10 mənşə bazarı arasında yer alıb (Yaponiya – 20%, Misir – 7% sonra gəlir).

Ekspert Rəyləri

Amadeus Avropa Mehmanxana kommersiya vitse-prezidenti Xavyer Kampo qeyd edib:

“UN Tourism ilə birlikdə apardığımız tədqiqatlar çox maraqlı nəticələr ortaya çıxardı. Azərbaycan və Qazaxıstan kimi istiqamətlərə artan maraq diqqətçəkicidir. Bu, səyahətçilərin seçimlərində diversifikasiya və ya regionlara yönəlik daha effektiv marketinq kampaniyalarının nəticəsi ola bilər. DMO-lar (Destination Marketing Organisation – İstiqamətlərin Marketinq Təşkilatları) üçün bu marağın real səfərlərə çevrilməsi üçün nəqliyyat imkanlarının artırılması, təcrübə əsaslı kontentin hazırlanması və regional əməkdaşlığın qurulması vacib ola bilər.”

Mərkəzi və Şərqi Avropaya Böyük İnvestisiyalar

Bu regionda 631 yeni marşrutun açılması hava əlaqələrinin gücləndirilməsinə ciddi investisiyaların qoyulduğunu göstərir. 2025-ci ilin aprel–oktyabr aylarında bu regiona səyahət edən sərnişinlərin sayı 12.2% artacaq – bu rəqəm ümumi Avropa ortalamasından yüksəkdir. Bu da bölgənin artan cazibəsini və genişlənən hava əlaqələrini əks etdirir.

UN Tourism Baş Katibi Zurab Pololikaşvili bildirib:

“Amadeus ilə bir daha əməkdaşlıq etməkdən məmnunuq. ‘Travel Insights 2025 – Focus on Europe’ adlı bu hesabat üzv dövlətlərimizin strateji qərarlar verməsi və turizm idarəçiliyini yaxşılaşdırması üçün etibarlı məlumatlarla təmin olunmasına töhfə verir.”

Xavyer Kampo əlavə edib:

“Amadeus Navigator360™ məlumatları hava nəqliyyatı və tutumun mövsümi olaraq dəyişdiyini göstərir. Xüsusilə iyul–avqust aylarında pik nöqtəyə çatır. Maraqlıdır ki, aprel–sentyabr 2025 dövründə tutum sərnişin sayından yüksəkdir, bu isə aviaşirkətlərin ya tələbatın artacağını gözlədiklərini, ya da bu artımı stimullaşdırmaq istədiklərini göstərir.

DMO-lar üçün mövsümdən kənar dövrlərdə (off-peak) turizmi stimullaşdırmaq və mövcud avia tutumdan ilboyu səmərəli istifadə etmək üçün strategiyalar hazırlamaq faydalı ola bilər.”